Wasiir Cali Xoosh Oo Soo Xiray Kulanka Nabadeynta

Muqdisho 20 Nov 2025; Wasiirka Arrimaha Gudaha, Federaalka iyo Dib u heshiisiinta XFS mudane Cali Yuusuf Cali (Xoosh) ayaa soo xiray shir 5tii maalin ee ugu dambeysay ka socday caasimadda Muqdisho kaasi oo mas’uuliyiin ka socday labada heer ee dowladda iyo qeynaha bulshada rayidka ah ee matalayey gobollada dalka uga arrinsanayeen Howlaha Nabadda, dhaqangelinta hannaanka Dhab u heshiisiinta iyo arrimo kale.

Shirkan oo uu goobjoog ka ahaa Agaasimaha Guud ee Waaaaradda mudane Caydaruus Macallin Xasan ayaa inta uu socday waxaa xoogga lagu saaray xal u helidda colaadaha iyo beegsiga ka baxsan Diinta iyo dhaqanka Soomaaliyeed, kor u qaadista dedaallada nabadeynta iyo hirgelinta hannaanka dhab u heshiisiinta qaran oo xal u ah dhammaan dhibaatooyinka jira.

Wasiirka Arrimaha Gudaha ee Soomaaliya mudane Cali Yuusuf Cali (Xoosh) oo madasha ka hadlay ayaa kaqeybgalayaasha ku adkeeyey ahmiyadda ay leedahay nabadda isaga oo isdul istaagay colaadaha iyo beegsiga foosha xun ee ka jira qeybo ka mid ah iyo saameynta ay ku leeyihiin xasiloonida dalka, waxaa uuna soojeediyey in laga wada shaqeeyo xal u helidooda, nabadeynta bulshada, wadajirka umadda iyo wada noolaashiyana.

Ugu dambeyntii, Wasiir Cali Xoosh ayaa ka digay hurinta colaadaha isaga oo sheegay in lala xisaabtami doono cidii ku dhaqaaqda falal khatar ku ah amniga umadda.