- October 20, 2025
- Posted by: Abdiladiif Ali
- Categories: Banaadir, Kulamada, Wararka
Muqdisho 20 Oct 2025; Wasiiru dowlaha Wasaaradda Arrimaha Gudaha, Federaalka iyo Dib u heshiisiinta XFS mudane Saadaad Maxamednuur Caliyow ayaa ka qeybgalay kulanka Golaha Aqalka sare, kaas oo akhriska 1-aad la marsiinayey Hindisaha- sharciga Dad-dhigista iyo Tirakoobka Xaaladaha Madaniga.
Mudane Wasiir Caliyow oo golaha ka hor akhriyey xeerka ayaa ku dheeraaday muhiimaddiisa isaga oo yiri “Hindise-Sharciyeedkan waxa uu dhisayaa nidaam qaran oo mideysan oo dad-dhigis iyo tirakoob, kaas oo:
1. Dammaanad qaadaya in dhalashada, guurka, furriinka iyo dhimashada si sharci ah loo diiwaangeliyo.
2. Sameynaya kayd xogeed qaran oo casri ah oo lagu kaydinayo dhammaan xogaha madaniga ah.
3. Fududeynaya in muwaadiniintu helaan shahaadooyin rasmi ah oo sharci ah.
4. Xoojinaaya kaalinta dowladaha hoose iyo dawlad-goboleedyada ee fulinta adeegyada.
5. Dejinaya nidaamyo casri ah oo dhijitaal ah si xogtu u ahaato mid la isku hallayn karo oo lagu kalsoonaan karo”
Hindise-sharciyeedkan oo sidoo kale dhisayaa Guddiga Qaran ee Hagidda Dad-dhigista, ayaa ah mid lagu casriyaynayo adeegga dad-dhigista Jamhuuriyadda Federaalka isla markaana la jaanqaadaya hannaanka federaalka ee Dalkeennu qaatay. Wuxuu muhiimad gaar ah u leeyahay adkaynta kalsoonida dawladnimada Soomaaliya iyo in shacabku helaan adeeg hagaagsan oo la isku hallayn karo.
Waxaa kale oo kulanka kaqeybgalay Agaasimaha Agaasinka Dad-dhigista mudane Cabdiqani Weheliye iyo sharciyaqaannada Wasaaradda.
