Wasiir Cali Xoosh Oo Qaabilay Wafdi Ka Socda QM Soomaaliya

Muqdisho 19 Oct 2025; Wasiirka Wasiirka Arrimaha Gudaha, Federaalka iyo Dib-u-heshiisiinta, Mudane Cali Yuusuf Cali (Xoosh) ayaa kulan la yeeshay Ku-xigeenka Ergayga Gaarka ah ee Xoghayaha Guud ee Qaramada Midoobay, Mudane George Conway, si ay uga wada hadlaan xoojinta iskaashiga iyo xiriirka shaqo ee u dhexeeya Dowladda Federaalka Soomaaliya iyo Qaramada Midoobay, gaar ahaan hawl-wareejinta shaqooyinka UNTMIS/CRESTA-A ee hawlaha xasilinta.

Kulanka oo sidoo kale goobjoob ka ahaayeen Wasiiru dowlaha mudane Saadaad Caliyow iyo Wasiir Kuxigeenka mudane Cabdixakiim Ashkir ayaa wuxuu wasiir Cali Xoosh uga mahadceliyay UNTMIS/CRESTA-A doorkii muhiimka ahaa ee ay ka ciyaareen ajandaha xasilinta Soomaaliya sanadihii la soo dhaafay ee heer federaal iyo dowlad goboleedba, isagoo bogaadiyay hanaanka wareejinta iyo kala-guurka fudud ee hadda socda.

Wasiirka ayaa u rajeeyay hawlwadeenada ka shaqaynayay hawlaha xasilinta ee UNTMIS oo hada shaqadoodu sii dhamaynayso guul iyo nasiib wanaagsan, isaga oo mar kale adkeeyay sida ay Dowladda Federaalka uga go’an tahay in ay sii xoojiso iskaashiga kala dhaxeeya hay’adaha Qaramada Midoobay ee taageeraya xasilinta iyo sookabashada degdega ah.