Wasiirka Arrimaha Gudaha, Federaalka iyo Dib u Heshiisiinta Mudane Axmed Macallim Fiqi ayaa maanta ku daahfuray caasimadda Muqdisho siminaar Istaraatiijiyadda warbaahinta iyo xiriirka ah oo ay qabashadiisa iska kaashadeen Wasaaradda iyo saxiibada caalamka ee ka taageerada Xasillinta, kaas oo lagu tababarayo Xafiisyada Xiriirka iyo warbaahinta ee Wasaaradaha Arrimaha Gudaha ee dowlad goboleedyada iyo gobolka Banaadir.
Wasiirka Arrimaha Gudaha Mudane Axmed Macallim Fiqi oo ka khudbad kooban kajeediyay ayaa ka hadlay ahmiyadda uu siminaarka noocan oo kale ah u leeyahay kobcinta aqoonta warbaahineed ee dowlad goboleedyada kuwaas oo ay ka socdaan howlo badan oo hortabin u leh qaranka sida howlgallada xorreynta ee ka dhanka ah Khawaarijta Shabaab, Xasillinta, Dib u heshiisiinno iyo arrimo kale.
Siminaarkan oo socon doona afar maalmood ayuu mudane Axmed Macallim Fiqi, Wasiirka Arrimaha Gudaha, Federaalka iyo Dib u heshiisiinta kula dardaarmay kaqeybgalayaasha in ay ka faa’ideystaan, dibna ay aqoontaasi ugu celiyaan goobihii ay ka yimaadeen.
